കൊല്ലം: ഭർത്താവുമായി പിണങ്ങി കഴിഞ്ഞ യുവതിയെ വിവാഹ വാഗ്ദാനം നൽകി പീഡിപ്പിച്ചു ഗർഭിണിയാക്കിയ യുവാവ് പിടിയിൽ. കൊല്ലം ഓയൂർ തച്ചക്കോട് മനങ്ങാട് അൽതാഫ് മൻസിലിൽ അൽതാഫ് (23) ആണ് പിടിയിലായത്. കുറച്ചുകാലമായി ഭർത്താവുമായി പിരിഞ്ഞു കഴിഞ്ഞ് വരുന്ന നാല് വയസുളള കുട്ടിയുടെ അമ്മയായ യുവതിയാണ് പീഡനത്തിന് ഇരയായത്. ഇൻസ്റ്റാഗ്രാം വഴിയാണ് യുവതിയുമായി അൽതാഫ് പരിചയത്തിലായത്.
തുടർന്ന് ഇയാൾ വിവാഹ വാഗ്ദാനം നൽകി കേരളപുരത്തും കരിക്കോടുമുളള ബന്ധുവിന്‍റെയും സുഹൃത്തിന്‍റെയും വീടുകളിൽ വച്ച് ലൈംഗികമായി പീഡിപ്പിക്കുകയായിരുന്നു. ഗർഭിണിയായ യുവതി സ്വകാര്യ ആശുപത്രിയിൽ ചികിത്സ തേടി. താൻ ഗർഭിണിയാണെന്നും വിവാഹം ഉടൻ നടത്തണമെന്നും യുവതി ആവശ്യപ്പെട്ടു. എന്നാൽ അൽത്താഫ് യുവതിയുടെ ആവശ്യം നിരാകരിക്കുകയായിരുന്നു.
തുടർന്ന് ഗർഭച്ഛിദ്രം നടത്താനായി യുവതി കൊല്ലത്തെ സ്വകാര്യ ആശുപത്രിയിലെത്തി. സ്വകാര്യ ആശുപത്രിയിൽ ചികിത്സയിലിരിക്കെ ഇവിടെയെത്തിയ അൽത്താഫ് യുവതിയെ ദേഹോപ്രദവം ഏൽപ്പിക്കാൻ ശ്രമിച്ചിരുന്നു.
ഇതോടെയാണ് യുവതി പൊലീസിൽ പരാതി നൽകിയത്. കൊല്ലം അസിസ്റ്റന്‍റ് കമ്മീഷണർ ജി.ഡി.വിജയകുമാറിന്‍റെ നേതൃത്വത്തിൽ കിളികൊല്ലൂർ ഇൻസ്പെക്ടർ വിനോദിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ 14 ദിവസത്തേക്ക് റിമാൻഡ് ചെയ്തു.
