കൊച്ചി:ജയിലില്‍ ഭീഷണി ഉണ്ടെന്ന സ്വര്‍ണക്കടത്ത് കേസ് പ്രതി സരിത്തിന്‍റെ പരാതിയില്‍ ഇന്ന് മൊഴിയെടുക്കും. പ്രത്യേക സിറ്റിംഗിലൂടെയാണ് എന്‍ ഐ എ കോടതി മൊഴിയെടുക്കുക. സ്വര്‍ണക്കടത്തുമായി ബന്ധപ്പെടുത്തി ബി ജെ പി, കോണ്‍ഗ്രസ് നേതാക്കളുടെ പേര് പറയാന്‍ സമ്മര്‍ദ്ദമുണ്ടെന്നാണ് സരിത്തിന്‍റെ ആരോപണം. ജയില്‍ ഉദ്യോഗസ്ഥര്‍ തന്നെ ഇതിനായി നിര്‍ബന്ധിക്കുന്നുവെന്നും സരിത്ത് പറയുന്നുണ്ട്.
മൊഴിയെടുക്കുന്നതിനായി ഉച്ചയോടെ സരിത്തിനെ എന്‍ ഐ എ കോടതിയില്‍ ഹാജരാക്കുമെന്നാണ് വിവരം. ജയിലില്‍ സരിത്തിനെ കാണാന്‍ എത്തിയ അമ്മയോടും സഹോദരിയോടും ആണ് തനിക്ക് ജയില്‍ അധികൃതരില്‍ നിന്ന് ഭീഷണിയുളള കാര്യം ഇയാള്‍ അറിയിച്ചത്. ഇതേപരാതിയുമായി സരിത്തിന്‍റെ അമ്മ കസ്റ്റംസിനേയും സമീപിച്ചിട്ടുണ്ട്.
കഴിഞ്ഞ ദിവസം റിമാന്‍ഡ് പുതുക്കുന്നതിനായി എന്‍ ഐ എ കോടതിയില്‍ ഓണ്‍ലൈന്‍ വഴി ഹാജരാക്കിയപ്പോഴും സരിത്ത് തനിക്ക് ഭീഷണിയുണ്ടെന്ന പരാതി ആവര്‍ത്തിച്ചു. ജയില്‍ അധികൃതര്‍ ഭീഷണിപ്പെടുത്തിയെന്നാണ് പരാതി. എല്ലാ കാര്യങ്ങളും ഓണ്‍ലൈന്‍ വഴി പറയാനാകില്ലെന്നും നേരിട്ട് ഹാജരാകാന്‍ അനുവദിക്കണമെന്നുമായിരുന്നു സരിത്ത് പറഞ്ഞത്.
