ന്യൂഡല്‍ഹി: ട്വിറ്ററിലൂടെ ബാലികയുടെ ചിത്രം പരസ്യപ്പെടുത്തിയതില്‍ പരാതിയില്ലെന്ന് ഡല്‍ഹിയില്‍ പീഡനത്തിനിരയായി കൊല്ലപ്പെട്ട ഒമ്ബത് കാരിയുടെ മാതാവ് .രാഹുല്‍ ഗാന്ധിയുടെ ട്വീറ്റിനെ സംബന്ധിച്ച്‌ വിവാദം കൊഴുക്കുന്നതിനിടെയാണ് പെണ്‍കുട്ടിയുടെ രക്ഷിതാക്കളുടെ പ്രതികരണം.
ഹരിദ്വാറില്‍ വെള്ളിയാഴ്ച പെണ്‍കുട്ടിയുടെ ചിതാഭസ്മം കുടുംബം നിമഞ്ജനം ചെയ്തിരുന്നു. പൊലീസിന്‍റെ സുരക്ഷയിലാണ് പെണ്‍കുട്ടിയുടെ കുടുംബം ഹരിദ്വാറിലെത്തിയത്.ആഗസ്റ്റ് നാലിനാണ് രാഹുല്‍ ഗാന്ധിയുടെ ട്വീറ്റും കൊല്ലപ്പെട്ട ബാലികയുടെ ചിത്രവും പ്രത്യക്ഷപ്പെട്ടത് .പെണ്‍കുട്ടിയുടെ കുടുംബത്തെ സന്ദര്‍ശിച്ചതിന് ശേഷമായിരുന്നു ട്വീറ്റ്. കൂടാതെ പെണ്‍കുട്ടിയുടെ രക്ഷിതാക്കളുടെ ചിത്രവും ഇതിനൊപ്പം പങ്കുവെച്ചിരുന്നു. രക്ഷിതാക്കളുടെ കണ്ണീര്‍, ഇന്ത്യയുടെ മകള്‍ക്ക് നീതി വേണമെന്ന് മാത്രമാണ് പറയുന്നതെന്നായിരുന്നു രാഹുലിന്റെ ട്വീറ്റ്.
ഇതിന് പിന്നാലെ വ്യാപകമായി വിമര്‍ശനങ്ങള്‍ ഉയരുകയും ബാലാവകാശ കമ്മീഷന്‍റെ നോട്ടീസിനെ തുടര്‍ന്ന് ട്വിറ്റര്‍ രാഹുല്‍ ഗാന്ധിയുടെ അക്കൗണ്ട് ലോക്ക് ചെയ്തിരുന്നു. അതെ സമയം ട്വിറ്റര്‍ ഇന്ത്യയുടെ നടപടിയെ വിമര്‍ശിച്ച്‌ കഴിഞ്ഞ ദിവസം രാഹുല്‍ രംഗത്തെത്തുകയും ചെയ്തിരുന്നു.
