ലഖ്നോ: കോവിഡ് ഭീഷണിക്കിടയിലും കന്‍വാര്‍ യാത്രയുമായി യു.പി സര്‍ക്കാര്‍ മുന്നോട്ട്. ഉത്തരാഖണ്ഡ് യാത്രക്ക് നിരോധനം ഏര്‍പ്പെടുത്തിയപ്പോഴും തീരുമാനത്തില്‍ നിന്നും പിന്മാറാന്‍ യു.പി തയാറായിട്ടില്ല. കന്‍വാര്‍ തീര്‍ഥാടകരെ മാത്രമേ പുണ്യസ്ഥലങ്ങളില്‍ അനുവദിക്കുവെന്ന് യു.പി വ്യക്തമാക്കിയിട്ടുണ്ട്. തീര്‍ഥാടകരുടെ എണ്ണം പരമാവധി നിയന്ത്രിക്കാന്‍ കന്‍വാര്‍ അസോസിയേഷനുകളോട് യു.പി സര്‍ക്കാര്‍ നിര്‍ദേശിച്ചു.
പടിഞ്ഞാറന്‍ യു.പിയില്‍ ശ്രദ്ധ കേന്ദ്രീകരിച്ച്‌ പ്രവര്‍ത്തിക്കാനാണ് സര്‍ക്കാറിന്‍റെ തീരുമാനം. ഉത്തരാഖണ്ഡിലേക്ക് തീര്‍ഥാടകര്‍ പോകാതിരിക്കാനുള്ള മുന്‍കരുതലുകള്‍ അതിര്‍ത്തികളില്‍ സ്വീകരിക്കും. യാത്രക്കിടെ കോവിഡ് പ്രോട്ടോകോള്‍ പാലിക്കുന്നുണ്ടോയെന്ന് ഉറപ്പ് വരുത്തുമെന്ന് യു.പി അഡീഷണല്‍ ഡയറക്ടര്‍ ജനറല്‍ പ്രശാന്ത് കുമാര്‍ പറഞ്ഞു. ആര്‍.ടി.പി.സി.ആര്‍ സര്‍ട്ടിഫിക്കറ്റ് നിര്‍ബന്ധമാക്കുന്നതും പരിഗണിക്കുമെന്ന് അദ്ദേഹം പറഞ്ഞു.
നേരത്തെ ഹരിദ്വാറിനെ കോവിഡ് ഹോട്ട്സ്പോട്ടാക്കാന്‍ താല്‍പര്യമില്ലെന്ന് പ്രഖ്യാപിച്ചായിരുന്നു ഉത്തരാഖണ്ഡ് സര്‍ക്കാര്‍ കന്‍വാര്‍ യാത്ര റദ്ദാക്കിയത്. ജനങ്ങളുടെ ജീവന്‍ അപകടത്തിലാക്കാന്‍ താല്‍പര്യമില്ലെന്നും ഉത്തരാഖണ്ഡ് മുഖ്യമന്ത്രി പറഞ്ഞിരുന്നു. ജൂലൈ 25 മുതല്‍ ആഗസ്റ്റ് ആറ് വരെ യാണ് കന്‍വാര്‍ യാത്ര. മൂന്ന് കോടി പേരെങ്കിലും പശ്ചിമ യു.പിയിലെ തീര്‍ഥാടന കേന്ദ്രങ്ങളില്‍ എത്തുമെന്നാണ് പ്രതീക്ഷിക്കുന്നത്.
