ഈ വര്‍ഷത്തെ 37-ാമത് ദേശീയ ഗെയിംസ് പ്രധാനമന്ത്രി നരേന്ദ്ര മോദി ഇന്ന് ഉദ്ഘാടനം ചെയ്യും.
മാര്‍ഗോ: ഈ വര്‍ഷത്തെ 37-ാമത് ദേശീയ ഗെയിംസ് പ്രധാനമന്ത്രി നരേന്ദ്ര മോദി ഇന്ന് ഉദ്ഘാടനം ചെയ്യും. ഗോവയിലെ മാര്‍ഗോയില്‍ പണ്ഡിറ്റ് ജവഹര്‍ലാല്‍ നെഹ്‌റു സ്റ്റേഡിയത്തില്‍ ഒക്ടോബര്‍ 26 മുതല്‍ നവംബര്‍ 9 വരെയാണ് ഗെയിംസ് നടക്കുന്നത്.
ഉദ്ഘാടന ശേഷം പ്രധാനമന്ത്രി കായികതാരങ്ങളെ അഭിസംബോധന ചെയ്യും.
‘ 37-ാമത് ദേശീയ കായിക മാമാങ്കം ഉദ്ഘാടനം ചെയ്യാൻ ഞാൻ ഇന്ന് ഗോവയില്‍ എത്തും. കളത്തിലെ മാന്യതയും ഐക്യം വര്‍ദ്ധിപ്പിക്കുന്നതിനൊപ്പം രാജ്യത്തിന്റെ വിവിധ ഭാഗങ്ങളിലുള്ള അത്ലറ്റുകളെ ഒരുമിപ്പിക്കുന്നതാകും ഗെയിംസ്. കഠിനാദ്ധ്വാനമുള്ള പ്രതിഭകളുടെ കഴിവുകളും കായിക രംഗത്തോടുള്ള അവരുടെ സ്നേഹവും ആഘോഷിക്കപ്പെടുന്ന ഒരു ഗെയിംസ് കൂടിയാകും ഇതെന്ന് എനിക്കുറപ്പുണ്ട്- പ്രധാനമന്ത്രി എക്സില്‍ കുറിച്ചു.
ഗോവ ദേശീയ ഗെയിംസിന് ആതിഥ്യം വഹിക്കുന്നത് ആദ്യമാണ്. 28 വേദികളായി 43 കായിക ഇനങ്ങളിലായി പതിനായിരത്തിലധികം കായിക താരങ്ങള്‍ പങ്കാളികളാകും.
