പാർലമെന്‍റ് മന്ദിരത്തിലേക്ക് രാഷ്ട്രപതിയെ ആനയിക്കാൻ ചെങ്കോല്‍.
ന്യൂഡല്‍ഹി: പാർലമെന്‍റ് മന്ദിരത്തിലേക്ക് രാഷ്ട്രപതിയെ ആനയിക്കാൻ ചെങ്കോല്‍. അയോധ്യയിലെ പ്രാണപ്രതിഷ്ഠക്ക് പിന്നാലെ തുടങ്ങിയ ബജറ്റ് സമ്മേളനത്തിന്‍റെ ആദ്യദിനത്തെ മുക്കി ‘ജയ് ശ്രീറാം’ ആരവം.
ലോക്സഭ തെരഞ്ഞെടുപ്പിനു മുമ്ബത്തെ അവസാന സമ്മേളനത്തില്‍ മോദിസർക്കാറിന്‍റെ ഭരണനേട്ടങ്ങളുടെ വിവരണമായി രാഷ്ട്രപതിയുടെ പ്രസംഗം.
ഇരുസഭകളെയും രാഷ്ട്രപതി അഭിസംബോധന ചെയ്യുന്ന ബജറ്റ് സമ്മേളനം പുതിയ പാർലമെന്‍റ് മന്ദിരത്തില്‍ ഇതാദ്യമായാണ് നടന്നത്. രാഷ്ട്രപതി പുതിയ മന്ദിരത്തില്‍ എത്തിയതും ആദ്യം. ലോക്സഭ, രാജ്യസഭാംഗങ്ങളെ പങ്കെടുപ്പിച്ച്‌ പഴയ മന്ദിരത്തിലെ സെൻട്രല്‍ ഹാളില്‍ നടന്നുവന്ന ഈ സമ്മേളനം നടപടിക്രമങ്ങളില്‍ പുതുമ വരുത്തിയാണ് ബുധനാഴ്ച ലോക്സഭ ഹാളില്‍ അരങ്ങേറിയത്.
പാർലമെന്‍റ് മന്ദിര ഉദ്ഘാടനത്തില്‍ ‘താര’മായശേഷം ലോക്സഭ ഹാളില്‍ സ്പീക്കറുടെ വേദിക്കരികില്‍ സ്ഥാപിച്ചിരുന്ന ചെങ്കോല്‍ സംയുക്ത സമ്മേളനത്തിലും താരമായി. കുതിരയെ പൂട്ടിയ രഥത്തില്‍ രാഷ്ട്രപതി ഭവനില്‍ നിന്ന് പാർലമെന്‍റ് മന്ദിരത്തിലേക്ക് എത്തിയ ദ്രൗപദി മുർമുവിനെ പ്രധാനമന്ത്രിയും രണ്ടു സഭാധ്യക്ഷന്മാരും ചേർന്ന് സ്വീകരിച്ച്‌ മന്ദിരത്തിലേക്ക് ആനയിച്ചപ്പോള്‍ പ്രത്യേക വേഷംധരിച്ച പാർലമെന്‍റ് ജീവനക്കാരൻ ചെങ്കോല്‍ ആദരപൂർവം ഏന്തി മുന്നില്‍ നടന്നു. രാഷ്ട്രപതി എത്തുന്നതിനു മുമ്ബേ ചെങ്കോല്‍ ചടങ്ങ് തുടങ്ങി.
ലോക്സഭ സ്പീക്കർ ഓം ബിർലയുടെ അകമ്ബടിയിലാണ് സ്പീക്കറുടെ വേദിക്കരികില്‍ ചില്ലുപേടകത്തില്‍ സ്ഥാപിച്ച ചെങ്കോല്‍ എടുത്ത് പാർലമെന്‍റിന്‍റെ പ്രധാന കവാടത്തിലേക്ക് നീങ്ങിയത്. അതിവിശിഷ്ട വ്യക്തികളെ ആനയിച്ച്‌ മുന്നില്‍ നടന്ന ചെങ്കോല്‍ വാഹകൻ, രാഷ്ട്രപതി സ്പീക്കറുടെ വേദിയിലേക്ക് കയറുന്നതിനിടയില്‍ നടുത്തളത്തില്‍ സെക്രട്ടറി ജനറലിന്‍റെയും മറ്റു ജീവനക്കാരുടെയും ഇരിപ്പിടങ്ങള്‍ക്ക് അരികെ രാഷ്ട്രപതിയുടെ കസേരക്ക് മുന്നിലായി ചെങ്കോല്‍ സ്ഥാപിച്ചു.
സംയുക്ത സമ്മേളനത്തെ അഭിസംബോധനചെയ്ത് തീരുംവരെ ചെങ്കോല്‍ വാഹകൻ വേദിക്കുതാഴെ ആദരപൂർവം നിലകൊണ്ടു.
തുടർന്ന് രാഷ്ട്രപതിയുടെ മടക്കയാത്രയിലും ചെങ്കോല്‍ മുന്നില്‍ നീങ്ങി. പ്രധാന കവാടത്തില്‍നിന്ന് കുതിരയെ പൂട്ടിയ രഥത്തില്‍ രാഷ്ട്രപതി തിരിച്ചുപോയശേഷം ലോക്സഭ ഹാളിലേക്ക് തിരിച്ചെത്തുമ്ബോള്‍ സ്പീക്കർക്കു മുന്നിലായിരുന്നു ചെങ്കോല്‍. സ്പീക്കറുടെ സാന്നിധ്യത്തില്‍ ചെങ്കോല്‍ ചില്ലുപേടകത്തില്‍ സ്ഥാപിച്ചു.
സംയുക്ത സൈനിക മേധാവിക്കും മുഖ്യ സേനാധിപന്മാർക്കും നടുത്തളത്തില്‍ ലോക്സഭ, രാജ്യസഭ സെക്രട്ടറി ജനറല്‍മാരുടെ കസേരക്ക് അടുത്തായിരുന്നു ഇരിപ്പിടം. മുൻകാലങ്ങളില്‍ വേദിയുടെ ഇടതുവശത്തെ അരികിലായിരുന്നു ഇവർക്ക് സ്ഥാനം. പ്രധാനമന്ത്രി നരേന്ദ്ര മോദി എം.പിമാർക്കുള്ള ഇരിപ്പിടങ്ങള്‍ക്ക് നടുവിലാണ് ഇരുന്നത്.
അഭിസംബോധനക്കുശേഷം ഭരണ-പ്രതിപക്ഷ നേതാക്കള്‍ക്കു മുന്നിലൂടെ രാഷ്ട്രപതി അഭിവാദ്യംചെയ്ത് നടക്കുന്ന പതിവുണ്ടായിരുന്നു. എന്നാല്‍ ഇത്തവണ സോണിയ ഗാന്ധി, മല്ലികാർജുൻ ഖാർഗെ തുടങ്ങിയ പ്രതിപക്ഷ നേതാക്കളുടെ അടുത്തേക്ക് രാഷ്ട്രപതി പോയില്ല.
