ഗുരുവായൂർ ക്ഷേത്രത്തില്‍ കണ്ണനെ കണി കാണാൻ വൻ ഭക്തജനത്തിരക്ക്. പുലര്‍ച്ചെ 2.42ന് വിഷുക്കണി ദർശനം ആരംഭിച്ചു.
രാത്രി അത്താഴപ്പൂജക്ക് ശേഷം കീഴ്ശാന്തി നമ്ബൂതിരിമാർ ക്ഷേത്ര മുഖമണ്ഡപത്തില്‍ കണി ഒരുക്കി വച്ചിരുന്നു.
പുലര്‍ച്ചെ 2.15ന് മുഖമണ്ഡപത്തിലെ. വിളക്കുകള്‍ തെളിയിച്ചു. മേല്‍ശാന്തി ശ്രീലക വാതില്‍ തുറന്ന് ആദ്യം ഗുരുവായൂരപ്പനെ കണികാണിച്ചു. ഗുരുവായൂരപ്പനെ കണികാണിച്ച ശേഷം കിഴക്കേഗോപുരവാതില്‍ തുറന്നു. തുടർന്ന് ഭക്തർക്ക് കണികാണാനുള്ള സൗകര്യം ഒരുക്കി. കണി ദർശനം കഴിഞ്ഞവർക്ക് മേല്‍ശാന്തി വിഷുക്കൈനീട്ടം നല്‍കി.
ഗുരുവായൂരില്‍ വിഷുപുലരി ദര്‍ശിക്കാന്‍ ആയിരക്കണക്കിന് ആളുകളാണ് ഒഴുകിയെത്തുന്നത്. ഇന്നലെ ഉച്ചയോടെ തന്നെ ക്ഷേത്രത്തിലേക്ക് ഭക്തര്‍ എത്തിത്തുടങ്ങി. ഇന്നലെ ഓട്ടുരുളിയില്‍ ഒരുക്കിയ കണിയില്‍ നെയ് തിരി കത്തിച്ച്‌ കണ്ണനെ കണികാണിച്ച ശേഷം വിഷു കൈനീട്ടം നല്‍കി. തുടര്‍ന്ന് ഭക്തര്‍ക്ക് ദര്‍ശനത്തിനുള്ള അവസരമൊരുക്കിയത്.
വിഷുക്കണി ദർശനം സുഗമമാക്കാൻ ദേവസ്വം, പോലീസ് ഉദ്യോഗസ്ഥർ നല്‍കുന്ന നിർദേശങ്ങള്‍ ഭക്തർ പാലിക്കണമെന്നും വിഷുദിന ക്രമീകരണങ്ങള്‍ ഫലപ്രദമാകാൻ എല്ലാ ഭക്തരുടെയും നിർലോഭമായ സഹകരണവും പിന്തുണയും ഉണ്ടാകണമെന്നും ദേവസ്വം ഭരണസമിതിക്കു വേണ്ടി ചെയർമാൻ ഡോ.വി.കെ.വിജയനും അഡ്മിനിസ്ട്രേറ്റർ കെ.പി.വിനയനും അഭ്യർത്ഥിച്ചു.
