ശബരിമല: ഇടവമാസ പൂജകള്‍ക്കായി ശബരിമല ശ്രീധര്‍മ്മശാസ്‌താ ക്ഷേത്ര നട തുറന്നു. ഇന്നലെ വൈകിട്ട്‌ അഞ്ചിനു ക്ഷേത്രതന്ത്രി കണ്‌ഠരര്‌ മഹേഷ്‌ മോഹനരുടെ മുഖ്യകാര്‍മ്മികത്വത്തില്‍ ക്ഷേത്രമേല്‍ശാന്തി പി.എന്‍.
മഹേഷ്‌ നമ്ബൂതിരി ക്ഷേത്രശ്രീകോവില്‍ നട തുറന്നു ദീപങ്ങള്‍ തെളിച്ചു. ഗണപതി, നാഗര്‍ എന്നീ ഉപദേവതാ ക്ഷേത്രനടകളും മേല്‍ശാന്തി തുറന്നു വിളക്കുകള്‍ തെളിച്ചു. തുടര്‍ന്നു തന്ത്രി വിഭൂതി പ്രസാദം വിതരണം ചെയ്‌തു.
പതിനെട്ടാം പടിക്കു മുന്നിലുള്ള ആഴിയില്‍ മേല്‍ശാന്തി അഗ്നി തെളിച്ചതോടെ ഇരുമുടിക്കെട്ടുമായി ശരണംവിളികളോടെ അയ്യപ്പഭക്‌തര്‍ പതിനെട്ടാം പടി കയറി അയ്യനെ കണ്ടുതൊഴുതു.
മാളികപ്പുറം മേല്‍ശാന്തി മുരളി നമ്ബൂതിരി മാളികപ്പുറം ക്ഷേത്ര നടതുറന്ന്‌ ഭക്‌തര്‍ക്ക്‌ മഞ്ഞള്‍പ്പൊടി പ്രസാദം നല്‍കി.
