ന്യൂ ഡല്‍ഹി | ലോക്‌സഭ തിരഞ്ഞെടുപ്പിലെ അഞ്ചാം ഘട്ട വോട്ടെടുപ്പ് ആരംഭിച്ചു.
ആറ് സംസ്ഥാനങ്ങളിലും രണ്ട് കേന്ദ്രഭരണ പ്രദേശങ്ങളിലുമായി 49 മണ്ഡലങ്ങളിലേക്കാണ് വോട്ടെടുപ്പ് നടക്കുന്നത്.
നിയമസഭാ തിരഞ്ഞെടുപ്പ് നടക്കുന്ന ഒഡീഷയിലെ 35 അസംബ്ലി സീറ്റുകളിലേക്കും ഇന്നാണ് വോട്ടെടുപ്പ്. ഒന്‍പത് കോടിയോളം വോട്ടര്‍മാരാണ് അഞ്ചാം ഘട്ടത്തില്‍ വിധി എഴുതുന്നത്.
മഹാരാഷ്ട്രയിലെ 13 മണ്ഡലങ്ങള്‍, ഉത്തര്‍പ്രദേശിലെ 14, പശ്ചിമ ബംഗാളിലെ ഏഴ്, ബിഹാറിലെ അഞ്ച്, ഝാര്‍ഖണ്ഡിലെ മൂന്ന്, ഒഡീഷയിലെ അഞ്ച് മണ്ഡലങ്ങളിലാണ് വോട്ടെടുപ്പ്. കേന്ദ്ര ഭരണ പ്രദേശമായ ജമ്മുകശ്മീര്‍, ലഡാക്ക് എന്നിവിടങ്ങളിലെ ഓരോ സീറ്റിലേക്കും ഇന്ന് മത്സരമുണ്ട്.
ഏറെ ചര്‍ച്ചയായ യു പിയിലെ അമേത്തിയിലും റായ്ബറേലിയിലും ഇന്ന് വോട്ടെടുപ്പ് നടക്കും.
രാഹുല്‍ ഗാന്ധി, സ്മൃതി ഇറാനി, രാജ്‌നാഥ് സിംഗ് തുടങ്ങിയ പ്രമുഖര്‍ ഇന്ന് ജനവിധി തേടും.
