ഇരുചക്ര വാഹനത്തില്‍ ഏഴ് കുട്ടികളുമായി യാത്ര ചെയ്ത യുവാവിനെ മുബൈ പോലീസ് അറസ്റ്റ് ചെയ്തു.
മുംബൈ| ഇരുചക്ര വാഹനത്തില്‍ ഏഴ് കുട്ടികളുമായി യാത്ര ചെയ്ത യുവാവിനെ മുബൈ പോലീസ് അറസ്റ്റ് ചെയ്തു. മുനവ്വര്‍ ഷാ എന്ന ആളാണ് അറസ്റ്റിലായത്.
സംഭവത്തിന്റെ വീഡിയോ സാമൂഹിക മാധ്യമങ്ങളില്‍ വ്യാപകമായി പ്രചരിച്ചതിനെ തുടര്‍ന്നാണ് മുംബൈ പോലിസ് യുവാവിനെ അറസ്റ്റ് ചെയ്തത്.
മുനവ്വര്‍ ഷാ തന്റെ സ്‌കൂട്ടറില്‍ രണ്ട് കുട്ടികളെ മുന്നില്‍ ഇരുത്തിയും മൂന്ന് കുട്ടികളെ പിന്‍ സീറ്റില്‍ ഇരുത്തിയും മറ്റ് രണ്ട് പേരെ പിന്നില്‍ നിര്‍ത്തിയുമാണ് വാഹനം ഓടിച്ചത്. അപകടകരമായ ഈ യാത്ര വീഡിയോയില്‍ കാണാനാകും. വഴിയാത്രക്കാരനായ ഒരാള്‍ ഈ വീഡിയോ മൊബൈലില്‍ പകര്‍ത്തി ട്വിറ്ററില്‍ പോസ്റ്റ് ചെയ്യുകയും മുംബൈ പോലീസിനെ ടാഗ് ചെയ്യുകയും ചെയ്തു.
സംഭവത്തില്‍ മുംബൈ പോലീസ് അന്വേഷണം ആരംഭിച്ചു. പ്രായപൂര്‍ത്തിയാകാത്ത ഈ കുട്ടികളില്‍ നാല് പേര്‍ മുനവ്വര്‍ ഷായുടെ കുട്ടികളും മറ്റ് മൂന്ന് പേര്‍ അയല്‍വാസിയുടെ കുട്ടികളുമാണ്. ഐപിസി സെക്ഷന്‍ 308 പ്രകാരം കേസെടുത്ത് യുവാവിനെ അറസ്റ്റ് ചെയ്തതായി മുംബൈ പോലീസ് അറിയിച്ചു.
