പൊന്നാനി: മൊബൈല്‍ ഫോണിന് വേണ്ടി സഹോദരിയുമായി വഴക്കിട്ടതില്‍ മനം നൊന്ത് പതിനാറുകാരന്‍ ആത്മഹത്യ ചെയ്തു. പൊന്നാനി സ്വദേശിയായ പുത്തന്‍കുളം സ്വദേശി കമ്മാലിക്കാനകത്ത് മുഹമ്മദലിയുടെ മകന്‍ നിഷാം (16) ആണ് ആത്മഹത്യ ചെയ്തത്. സഹോദരിയുമായി മൊബൈല്‍ ഫോണിനായി പിടിവലികൂടുന്നതിനിടെ ഫോണ്‍ താഴെവീണു പൊട്ടുകയായിരുന്നു. തുടര്‍ന്ന് ബാപ്പ വഴക്ക് പറയുമെന്ന് ഭയന്ന് വിദ്യാര്‍ത്ഥി ജീവനൊടുക്കുകയായിരുന്നു.
പൊന്നാനി എം.ഐ ഹൈസ്കൂളില്‍നിന്ന് പത്താം ക്ലാസ് പൂര്‍ത്തിയാക്കിയ നിഷാം പ്ലസ് വണ്‍ പ്രവേശനത്തിന് തയാറെടുക്കുകയായിരുന്നു. നിഷാമിന്റെ മൃതദേഹം പോസ്റ്റ് മോര്‍ട്ടത്തിന് ശേഷം ബന്ധുക്കള്‍ക്ക് വിട്ടുകൊടുത്തു.
അതേസമയം, സംസ്ഥാനത്ത് പ്രായപൂര്‍ത്തിയാകാത്തവരില്‍ ആത്മഹത്യാ പ്രവണത വര്‍ധിച്ചു വരുന്നതയാണ് കണക്കുകള്‍ സൂചിപ്പിക്കുന്നത്. ലോക്ഡൗണ്‍ കാലഘട്ടങ്ങളിലടക്കം അനേകം കുട്ടികളാണ് ആത്മഹത്യ ചെയ്തിരിക്കുന്നത്. പ്രശ്നങ്ങളെ തരണം ചെയ്യാനുള്ള കരുത്ത് കുട്ടികള്‍ക്കില്ലെന്നും, ഇത് മാതാപിതാക്കള്‍ കൂടുതല്‍ ശ്രദ്ധിക്കേണ്ട വിഷയമാണെന്നും ആരോഗ്യ വിദഗ്ധര്‍ പറയുന്നു.
