ന്യൂഡല്‍ഹി: ലഖിംപൂര്‍ സംഘര്‍ഷത്തില്‍ യുപി സര്‍ക്കാരിനെ രൂക്ഷമായി വിമര്‍ശിച്ച്‌ സുപ്രീംകോടതി . ലഖിംപുര്‍ കൂട്ടക്കൊലയുമായി ബന്ധപ്പെട്ട് യുപി പോലീസ് സ്വീകരിച്ച നടപടിയില്‍ അതൃപ്തി പ്രകടിപ്പിച്ച്‌ കോടതി . കൊലക്കുറ്റം ചുമത്തിയ കേസില്‍ സാധാരണ ഇത്രയും ഉദാര സമീപം ഉണ്ടാകുമോ എന്ന് കോടതി ആരാഞ്ഞു എന്ത് സന്ദേശമാണ് യുപി സര്‍ക്കാര്‍ ജനങ്ങള്‍ക്ക് നല്‍കുന്നത്.? കേസില്‍ ഉള്‍പ്പെട്ടവര്‍ ഉന്നതരായതിനാല്‍ സിബിഐ അന്വേഷണം എന്ന ആവശ്യത്തിലും കാര്യമില്ല. കേസിലെ എല്ലാ തെളിവുകളും സംരക്ഷിക്കാന്‍ ഡിജിപിക്ക് കോടതി നിര്‍ദേശം നല്‍കി.
വാഹനം കര്‍ഷകര്‍ക്ക് മേല്‍ ഓടിച്ചുകയറ്റിയ കേസില്‍ ആരോപണ വിധേയനായ ആശിഷ് മിശ്ര ചോദ്യം ചെയ്യലിന് ഹാജരാകാന്‍ കൂടുതല്‍ സമയം തേടിയെന്ന് ഉത്തര്‍പ്രദേശ് സര്‍ക്കാര്‍ കോടതിയെ അറിയിച്ചു.
അതിനായി ശനിയാഴ്ച രാവിലെ 11 മണിവരെ സമയം നല്‍കിയെന്നും എന്നിട്ടും ഹാജരായില്ലെങ്കില്‍ നടപടി എടുക്കുമെന്നാണ് സര്‍ക്കാര്‍ അറിയിച്ചത്. ഈ വാദം കേട്ട കോടതി ഇതേ കുറ്റം ചെയ്ത മറ്റുള്ളവരോട് ഇതേ നിലപാട് തന്നെയാകുമോ എന്ന് സര്‍ക്കാര്‍ അഭിഭാഷകനോട് ചോദിച്ചു.
