ഗുജറാത്തില്‍ തിരുച്ചിറപ്പള്ളി-ശ്രീ ഗംഗാനഗര്‍ ഹംസഫര്‍ എക്സ്പ്രസ് ട്രെയിനില്‍ വൻ തീപിടിത്തം
ഗാന്ധിനഗര്‍: ഗുജറാത്തില്‍ തിരുച്ചിറപ്പള്ളി-ശ്രീ ഗംഗാനഗര്‍ ഹംസഫര്‍ എക്സ്പ്രസ് ട്രെയിനില്‍ വൻ തീപിടിത്തം. ട്രെയിനിന്റെ ജനറേറ്റര്‍ കോച്ചിലും അതിനോട് ചേര്‍ന്നുള്ള പാസഞ്ചര്‍ കാറിലുമാണ് തീപിടിത്തമുണ്ടായത്.
ഗുജറാത്തിലെ വല്‍സാദ് റെയില്‍വേ സ്റ്റേഷനില്‍ നിന്ന് പുറപ്പെട്ടതിന് തൊട്ടുപിന്നാലെ ആയിരുന്നു അപകടം.ഇന്ന് ഉച്ചയ്‌ക്ക് രണ്ട് മണിയോടെയാണ് അപകടം നടന്നത്.
സൂററ്റിലേക്ക് പുറപ്പെട്ട ഹംസഫര്‍ എക്സ്പ്രസിന്റെ രണ്ട് എസി കോച്ചുകള്‍ക്കാണ് തീപിടിച്ചത്. പവര്‍ കോച്ചില്‍ തീ പടര്‍ന്ന് തൊട്ടടുത്തുള്ള ബി1 കോച്ചിലേക്ക് പടരുകയായിരുന്നുവെന്നാണ് പോലീസ് സൂപ്രണ്ട് കരണ്‍രാജ് വഗേല പറയുന്നത്. വിവരമറിഞ്ഞ് അഗ്‌നിശമനസേന ഉദ്യോഗസ്ഥരും സ്ഥലത്തെത്തി. നിലവില്‍ രക്ഷാപ്രവര്‍ത്തനം നടന്നുവരികയാണ്.
അതേസമയം ബോഗിയില്‍ നിന്ന് പുക ഉയരുന്നത് കണ്ട ഉടൻ തന്നെ ട്രെയിൻ നിര്‍ത്തി യാത്രക്കാരെ എല്ലാവരെയും ഇറക്കി. ആര്‍ക്കും പരിക്കേറ്റിട്ടില്ലെന്നും എല്ലാവരും സുരക്ഷിതരാണെന്നും ഉദ്യോഗസ്ഥര്‍ അറിയിച്ചു.
