മഹേഷ് ബാബുവിന്റെ സര്‍ക്കാരു വാരി പാട്ട മെയ് 12 ന് പ്രദര്‍ശനത്തിനെത്തുമെന്ന് പ്രഖ്യാപിച്ചു. ഏപ്രില്‍ 1 ന് ചിത്രം റിലീസ് ചെയ്യാന്‍ നേരത്തെ തീരുമാനിച്ചിരുന്നു, എന്നാല്‍ ചിത്രീകരണവും ആര്‍ആര്‍ആറിന്റെ റിലീസും വൈകുന്നത് കാരണം ചിത്രം നീട്ടിവെക്കുകയായിരുന്നു.
മഹേഷ് ബാബു ഒരു കഷ്ണം വെള്ളരിക്കാ കണ്ണിന് മുകളില്‍ വച്ച്‌ സോഫയില്‍ വിശ്രമിക്കുന്ന പുതിയ പോസ്റ്ററോടെയാണ് റിലീസ് തീയതി പ്രഖ്യാപിച്ചത്. ചിത്രം ആദ്യം സംക്രാന്തി റിലീസ് ലക്ഷ്യമിട്ടായിരുന്നുവെങ്കിലും ജനുവരി 7ന് റിലീസ് ചെയ്യാനിരുന്ന ആര്‍ആര്‍ആറുമായുള്ള സംഘര്‍ഷം ഒഴിവാക്കാന്‍ ഏപ്രിലിലേക്ക് മാറ്റുകയായിരുന്നു.
സര്‍ക്കാരു വാരി പാട്ടയില്‍ മഹേഷ് ബാബുവിനൊപ്പം കീര്‍ത്തി സുരേഷാണ് നായിക. വിജയ് ദേവരകൊണ്ടയും രശ്മിക മന്ദന്നയും അഭിനയിച്ച ഗീത ഗോവിന്ദം എന്ന ഹിറ്റ് ചിത്രം സംവിധാനം ചെയ്ത പരശുറാം പെറ്റ്‌ലയാണ് ഒരു ആക്ഷന്‍ എന്റര്‍ടെയ്‌നറായി കണക്കാക്കപ്പെടുന്ന ചിത്രം സംവിധാനം ചെയ്യുന്നത്.
ചിത്രത്തിലെ ആദ്യ സിംഗിള്‍ ഫെബ്രുവരി 14ന് പുറത്തിറങ്ങും. ജിഎംബി എന്റര്‍ടൈന്‍മെന്റ്‌സ്, മൈത്രി മൂവി മേക്കേഴ്‌സ്, 14 റീല്‍സ് പ്ലസ് എന്നിവയുടെ ബാനറുകളില്‍ സംയുക്തമായാണ് ചിത്രം നിര്‍മ്മിച്ചിരിക്കുന്നത്.
